"Ne si Kisha Shtëpia e Lutjes, prej disa vitesh me rradhë kemi zgjedhur të bëhemi pjesë e Kampit Aventura. Eksperienca personale por edhe e fëmijëve që kam shoqëruar si kujdestare në këtë kamp, ka qenë e mrekullueshme.

Organizimi është shumë mirë i koordinuar dhe ditët të mbushura plot aktivitete argëtuese dhe ndërtuese. Fëmijët janë ndjerë të sigurt dhe të mirëpritur. Stafi organizues ka qenë gjithmonë i pranishëm dhe i gatshëm në çdo dhe për çdo gjë.

Mbas kampit kemi patur fëmijë të përkushtuar, të përgjegjshëm dhe më të afruar me Perëndinë, si dhe disa dishepuj të ardhshëm të cilët kanë folur dhe kanë ndarë besimin me fëmijë të tjerë. Çdo vit, fëmijët e presin me padurim kampin. Vlerësoj dhe falënderoj organizatorët për përpjekjet e tyre për ta bërë këtë kamp të paharrueshëm, duke mbajtur ndezur dëshirën për t’u rikthyer."

"I jemi falënderues Perëndisë për mundësitë dhe larmishmërinë e materialeve që kemi mundur të aksesojmë nga gama e gjerë e burimeve që Shkëndijë ofron, si kurrikula, këngë, lojëra, kukulla teatri etj.

Tashmë për një periudhë 6 vjeçare përdorim këto burime, të cilat janë jo vetëm një lehtësi, si një material i gatshëm dhe praktik, por janë edhe të thjeshta për t’u përdorur, argëtuese dhe të pasura me mësime të vyera e praktike, për rritjen frymërore të fëmijëve.

Me shumë rezultat dhe lehtësi kurrikulat e ‘Shkëndijë’ i kemi përdorur edhe për kampet verore. Punën me fëmijë e kanë bërë më të lehtë edhe trajnimet e ndryshme të stafit për përdorimin e këtyre programeve, kukullave etj. Bashkëpunimet tona kanë qenë të frytshme, ndaj presim me dëshirë programet e reja."